ဖြစ်ချင်တာတွေ များလွန်းသူတစ်ယောက်

ဒီအကြောင်းကို ရေးမလို့စဉ်းစားထားတာ ကြာပါပြီ။ ဒါပေမယ့် ကိုယ်တိုင်လည်းတခါတလေ မှားတတ်၊ လွဲတတ်လို့ ရေးဖို့လက်တွန့်နေခဲ့တာ။ ဘာအကြောင်းလည်း ဆိုတာတော့ ဖတ်ကြည့်ရင် သဘောပေါက်ကြမှာပါ။

တနေ့က အိမ်မှာရှိတဲ့ Primary တက်နေတဲ့ မောင်ဝမ်းကွဲလေးနဲ့ အေးဆေးစကားပြောဖြစ်ပါတယ်။ ခါတိုင်းဆိုသူက ဂိမ်းဆော့နေတာနဲ့ ကိုယ်ကလည်း ကွန်ပျူတာသုံးနေတာဆိုတော့ အမှတ်တမဲ့ပါပဲ။ တနေ့ကတော့ နေ့ခင်းဖက်ပျင်းလည်းပျင်းတာနဲ့ သူဂိမ်းဆော့တာထိုင်ကြည့်ရင်း စကားပြောကြတော့ ဗမာစကားတော်တော်များများကို သူမေ့နေပါပြီ။ သူဒီကိုရောက်တာ တစ်နှစ်သာသာလေး ပဲရှိပါသေးတယ်။ ဒါပေမယ့် စကားတော်တော်များများကို သူမမှတ်မိတော့ပါဘူး။ သူနဲ့စကားပြောရတာ တော်တော်လည်း ရယ်ရပါတယ်။ သူဆော့နေတဲ့ဂိမ်းထဲက အကောင်တွေက ကြောက်ဖို့ကောင်းတယ် ဆိုတာကို “အကောင်တွေက ထိတ်လန့်စရာကြီးနော်" တဲ့။ သူ့ခမျာ စကားနဲ့ စာနဲ့ မခွဲတတ်တော့ဘူး ဖြစ်နေတယ်။ ဒါတောင် အိမ်မှာဆို ဗမာလိုပဲပြောကြတာပါ။ အသုံးနည်းတဲ့ စကားလုံးတွေသူမမှတ်မိတော့ပါဘူး။ ကြာရင်ဗမာစကားကို တော်တော်ခက်ခက်ခဲခဲ ပြောယူရမယ့်ပုံရှိပါတယ်။ ဒါက ကလေးတစ်ယောက်ရဲ့ တကယ်မမှတ်မိတော့လို့ မှားတာပါ။

ဒါပေမယ့် တချို့သောသူတွေကတော့ ဖက်ရှင်လုပ်ပြီးကို မေ့ချင်ယောင် ဆောင်နေကြပါတယ်။ နိုင်ငံခြားမှာနေတာကြာလို့ ဗမာလိုတောင် မေ့နေပြီဆိုတာကို ဂုဏ်ယူပြီးပြောတတ်ကြပါတယ်။ အဲလိုလူတွေများလာရင် ဗမာစကားရဲ့ အခြေအနေရင်လေးစရာပါ။ အမျိုးထဲမှာ တစ်ယောက်ရှိပါတယ်။ နိုင်ငံခြားမှာနေတာ ၄နှစ်လောက်ရှိပါပြီ။ ၁နှစ် တစ်ခါ မြန်မာပြည်ပြန်လည်ပါတယ်။ သူက ပန်းဝယ်ချင်တာကို ပန်းသည်ကိုတောင် မခေါ်တတ်တော့လို့ပါတဲ့။ ပန်းသည်ကို ဘယ်လိုလှမ်းခေါ်လိုက်ရမလဲတဲ့။ အနားရှိတဲ့သူတွေတော့ ဘယ်လိုနေသလဲမသိပါဘူး၊ တဆင့်ပြန်ကြားရတဲ့သူတော့ တော်တော်ကို နားကြားပြင်းကပ်ရပါတယ်။ နောက်ပြီး ၀က်သားကိုလည်း သူ့ခမျာ “၀က်သာ” ပါတဲ့။ စကားမပီလို့ သူကတိုင်းရင်းသူလေးလားလို့တော့ မထင်လိုက်ကြပါနဲ့။ ဗမာပြည်မှာနေတုန်းက ၀က်သားကို ၀က်သားလို့ ပီပီသသပြောခဲ့တဲ့ ဗမာစစ်စစ်ကြီးပါ။ အင်း ဖက်ရှင်ထွင်ကြတာများ လွန်လှပါလားလို့။

အရင်ကတော့ နိုင်ငံခြားကပြန်လာလို့ မြန်မာလိုမပြောတတ်ရင် ဘိလပ်ပြန် မောင်သောင်းဖေ ဆိုပြီးဝိုင်းစကြ၊ နောက်ကြပါတယ်။ အခုတော့ ဒါကိုပဲ လူအထင်ကြီးစရာကြီး တစ်ခုလိုဖြစ်နေကြတာ နားမလည်နိုင်အောင်ပါပဲ။ ချိုကိုလည်း တခါတလေမေ့ပါတယ်။ မြန်မာလိုက အမြဲတမ်းပြောနေရတာမဟုတ်တော့ တချို့စကားလုံးတွေကို တော်တော်စဉ်းစားရပါတယ်။ ဒါပေမယ့် အဲဒါကိုတော့ မကြွားချင်ပါဘူး။ ဗမာဖြစ်ပြီး ဗမာစကားမတတ်တာ ကြွားစရာ မဟုတ်ဘူးလို့ထင်ပါတယ်။ ကျောင်းနေခဲ့တုန်းကလည်း တော်တော်တွေ့ပါတယ်။ စကားပြော မှားကြတာတွေ။ ကိုယ်တိုင်ကလည်း မနေနိုင်တော့ ပြင်ပေးမိတယ်။ သူတို့ကခေါ်ကြတယ်၊ စကားတောင်စားတဲ့။ ကိုယ်ကမှမနေတတ်တော့ ပြောလည်းခံရုံရှိတော့တာပေါ့။